Panghihina o Pagkapagod na Hindi Tiyak ang Sanhi

Magkaibang kondisyon ang panghihina at pagkapagod. Kung minsan, iniisip ng mga tao na sila ay mahina, samantalang ang totoo, sila ay pagod. Mahalagang maunawaan ang pagkakaiba sa pagitan ng panghihina at pagkapagod, para makakuha ka ng tamang tulong sa kung ano ang nararamdaman mo.

• Panghihina. Ito ay kapag hindi malakas ang iyong mga kalamnan gaya nang nararapat. Maaari itong malinang nang mabilis o mabagal sa paglipas ng panahon. Maaari nitong maapektuhan lahat ng kalamnan ng katawan (pangkalahatang panghihina) o isang bahagi lamang ng katawan. Kabilang sa ilang dahilan ng pangkalahatang panghihina ang nabawasang physical fitness, pagkawala ng tisyu ng kalamnan dahil sa mahabang panahon ng kawalan ng aktibidad, hindi normal na mga lebel ng electrolyte, at paggamit ng ilang gamot, tulad ng corticosteroids. Kabilang sa ilang dahilan ng panghihina sa partikular na mga kalamnan ang mga stroke, pagkasira ng ugat, napinsalang disk sa gulugod, at mga sakit na neurological, tulad ng multiple sclerosis. Nakadepende ang mga sintomas ng panghihina sa kung anong mga kalamnan ang apektado.

• Pagkapagod. Ito ay kapag nakakaramdam ka ng labis na pagkapagod, nanlulupaypay, o walang lakas. Ito ay kapag nakakaramdam ka ng matinding pangangailangan na magpahinga o may kaunting enerhiya na nahihirapang gumawa ng anumang aktibidad. Maaari itong mangyari kung sobra kang aktibo o hindi gaanong aktibo, nai-stress, walang sapat na magandang kalidad ng pagtulog, o may hindi malusog na diyeta. Kabilang sa iba pang dahilan ng pagkapagod ang mga impeksiyon na dulot ng virus, mga problema sa emosyon, lalo na ang depresyon, at malubhang mga sakit, tulad ng pagpalya ng puso at kanser. Maaari ding magdulot ng pagkapagod ang masasamang epektong dulot ng gamot. Ang pagkapagod ay kadalasang palatandaan na may ibang nangyayari.

Batay sa iyong pagsusuri ngayon, hindi malinaw ang eksaktong dahilan ng iyong mga sintomas. Gayunpaman, ang iyong mga sintomas ay mukhang hindi senyales ng seryosong sakit sa ngayon. Bantayan ang iyong mga sintomas at humingi ng medikal na pagpapayo ayon sa iniuutos sa ibaba.