Malalim na Pag-ubo

Hakbang 1

• Umupo sa gilid ng kama o upuan. Maaari ka ring humiga nang nakatihaya na bahagyang nakatiklop abg iyong mga tuhod.

• Dumukwang nang bahagya.

• Kung naoperahan ka sa iyong dibdib o sikmura, humawak ng isang unan o nakarolyong tuwalya nang mahigpit laban sa iyong sugat (hiwa) gamit ang parehong kamay. Yakapin ang unan.

• Huminga nang normal.

Hakbang 2

• Lumanghap ng hangin nang mabagal at malalim gamit ang iyong ilong.

• At huminga palabas sa iyong bibig. Ulitin ang ganitong paghinga papasok at palabas sa ikalawang beses.

• Para sa ikatlong beses, huminga nang mabagal at malalim gamit ang iyong ilong. Punuin ng hangin ang iyong mga baga hangga't kaya mo.

Hakbang 3

• Umubo ng 2 o 3 beses na magkasunod. Subukang itulak ang lahat ng hangin palabas ng iyong mga baga habang umuubo ka. Takpan ang iyong ubo, kung maaari, gamit ang tisyu o iyong siko.

• Kung umubo ka ng may plema, idura ito sa tisyu. Huwag itong lunukin.

• Magrelaks at huminga nang normal.

• Ulitin ang mga nabanggit na hakbang ayon sa itinagubilin.

• Hugasan ang iyong mga kamay gamit ang sabon at malinis na dumadaloy na tubig sa loob ng 20 segundo pagkatapos.

Follow-up na pangangalaga

Mag-follow up sa iyong tagapangalaga ng kalusugan, o ayon sa ipinayo.

Kailan dapat tumawag sa iyong tagapangalaga ng kalusugan

Tumawag agad sa iyong tagapangalaga ng kalusugan kung mayroon ka ng alinman sa mga sumusunod:

• Lagnat na 100.4°F (38°C) o mas mataas, o ayon sa ipinayo ng iyong tagapangalaga

• Mga palatandaan ng impeksiyon, kung naoperahan ka. Kabilang sa mga ito ang pamumula, pamamaga, pagtagas, o pag-init sa bahagi ng iyong hiwa, o nanan o likido na tumatagas mula sa bahagi

• Kaunting pagdurugo mula sa bahagi na inopera

• Kulay kayumanggi, puti, or madugong plema

• Pagkahilo o pagsusuka

• Maraming pananakit

• Mabilis o hindi regular na tibok ng puso

• Bagong ubo

Tumawag sa 911

Maaaring palatandaan ang kakapusan ng hininga ng isang malubhang problema sa kalusugan. Tumawag kaagad sa 911 kung mayroon kang kakapusan ng hininga na lumalala o nahihirapan kang huminga, lalo na kapag may alinmang sintomas na nasa ibaba:

• Pagkatuliro o nahihirapang manatiling gising

• Pagkawala ng malay o nahihimatay

• Pananakit o paninikip ng dibdib

• Hirap huminga o may sipol na paghinga

• Nagiging kulay asul ang balat, mga labi, o mga kuko

• Pag-ubo ng dugo

• Matinding pananakit

• Pagkahilo o panghihina

• Matinding pagdurugo o bagong pagbuka sa bahagi na inopera